អគ្គលេខាធិការដ្ឋាន
១-ការធ្វើផែនការបណ្តុះបណ្តាលរយៈពេល៥ឆ្នាំ (២០០៨ - ២០១២)
អគ្គលេខាធិការដ្ឋាន នៃរាជបណ្ឌិតសភាវិជ្ជាជីវៈតុលាការបានរៀបចំផែនការបណ្តុះបណ្តាលរយៈពេល៥ឆ្នាំ (២០០៨ - ២០១២) ដែលផែនការនេះ ត្រូវបានអនុម័តជាផ្លូវការដោយសម័យប្រជុំលើកទី៥ របស់ក្រុមប្រឹក្សាភិបាលនៃរាជបណ្ឌិតសភាវិជ្ជាជីវៈតុលាការ ចុះថ្ងៃទី ១១ ខែ ធ្នូ ឆ្នាំ ២០០៧ ។
អានលំអិតអំពី ផែនការបណ្ដុះបណ្តាលរយៈពេល៥ឆ្នាំរបស់រាជបណ្ឌិតសភាវិជ្ជាជីវៈតុលាការ
២- បេសកកម្ម នៅតាមសាលាដំបូងខេត្ត-ក្រុង នានា
ជារៀងរាល់ឆ្នាំ គណៈគ្រប់គ្រងរាជបណ្ឌិតសភាវិជ្ជាជីវៈតុលាការ បានចុះបេសកកម្មទៅតាមសាលាដំបូងខេត្ត-ក្រុងនានា ក្នុងគោលបំណង ៣ គឺ៖
- ពិនិត្យ និងតាមដានការធ្វើកម្មសិក្សា របស់សិស្សចៅក្រម
- ការដាក់សិស្សក្រឡាបញ្ជី ឲ្យធ្វើកម្មសិក្សា នៅតាមសាលាដំបូងខេត្ត-ក្រុងនានា
- ស្វែងយល់ពីតម្រូវការចៅក្រម ព្រះរាជអាជ្ញារង និងក្រឡាបញ្ជី តាមសាលាខេត្ត-ក្រុងនានា
៣- កិច្ចសហប្រតិបត្តិការអន្តរជាតិ
៣-១ កិច្ចសហប្រតិបត្តិការបារាំង ៖
ភាគីបារាំងបាននឹងកំពុងជួយធ្វើការបណ្តុះបណ្តាលនៅតាមសាលាភូមិន្ទចៅក្រម និងសាលាភូមិន្ទក្រឡាបញ្ជី លើកិច្ចការព្រហ្មទណ្ឌ។ ចំណែកឯសាលាពីរទៀតដែលទើបតែបង្កើតថ្មី គឺសាលាភូមិន្ទអាជ្ញាសាលា និងសាលាភូមិន្ទសារការី បារាំងក៏នឹងជួយធ្វើការបណ្តុះបណ្តាលផងដែរ។
៣-២ កិច្ចសហប្រត្តិការជប៉ុន ៖
ភាគីជប៉ុននៅតែបន្តជួយធ្វើការបណ្តុះបណ្តាល លើកិច្ចការរដ្ឋប្បវេណី ដល់ចៅក្រម ក្រឡាបញ្ជី ព្រមទាំងជួយបណ្តុះបណ្តាលគ្រូបណ្ដុះបណ្ដាលផងដែរ។ ការបណ្ដុះបណ្ដាលគ្រូ ត្រូវធ្វើនៅកម្ពុជា និងប្រទេសជប៉ុន មានរយៈពេល ១ឆ្នាំ។ រហូត មកដល់ឆ្នាំ២០០៩នេះ ភាគីជប៉ុនជួយបណ្ដុះបណ្ដាលគ្រូ បានចំនួន២ក្រុម ដែលក្រុមទី១ មានគ្រូចំនួន៧នាក់ និងក្រុមទី២ មានចំនួន៩នាក់។ សព្វថ្ងៃនេះ គ្រូក្រុមទី១បានទទួលការបណ្ដុះបណ្ដាលចប់ដោយជោគជ័យ ហើយកំពុងបង្រៀនសិស្សចៅក្រម សិស្សក្រឡាបញ្ជី និងធ្វើជាគ្រូជំនួយក្នុងកម្មវិធីបណ្ដុះបណ្ដាលបន្ត សម្រាប់ចៅក្រមផងដែរ។ ចំពោះគ្រូក្រុមទី២ បានចាប់ផ្តើមទទួលការបណ្ដុះបណ្ដាល តាំងពីថ្ងៃទី៣០ ខែឧសភា ឆ្នាំ២០០៨ មកម៉្លេះ ហើយបានទៅប្រទេសជប៉ុន ពីថ្ងៃទី៦ ដល់១៧ ខែតុលា ឆ្នាំ២០០៨។
៣-៣ កិច្ចសហប្រត្តិការអាល្លឺម៉ង់ ៖
នាឆ្នាំ២០០៨ ភាគីអាល្លឺម៉ង់បានជួយធ្វើការបណ្តុះបណ្តាលតាមរយៈអង្គការពីរគឺ អង្គការ GTZ និង អង្គការ InWent
- ទី១៖ អង្គការ GTZ ជួយបណ្តុះបណ្តាលលើប្រធានបទស្តីពី អំពើហិង្សាក្នុងគ្រួសារ ដល់សិស្សចៅក្រម និងចៅក្រម កំពុងបំពេញការងារ ព្រមទាំងបណ្ដុះបណ្ដាលគ្រូផងដែរ។
- ទី២៖ អង្គការ InWent បានផ្តល់អាហារូបករណ៍ដល់សិស្សចៅក្រមជំនាន់ទី៣ ចំនួន៦រូប ដើម្បីចូលរួមវគ្គបណ្តុះបណ្តាល ស្តីពី ច្បាប់ឧក្រឹដ្ឋកម្មអន្តរជាតិ ជាដំណាក់កាលដូចខាងក្រោមៈ
- ដំណាក់កាលទី១៖ ថ្ងៃទី២៤ ខែ មីនា ដល់ ថ្ងៃទី៥ ខែ មេសា ឆ្នាំ ២០០៨ រៀនច្បាប់ឧក្រឹដ្ឋកម្មអន្តរជាតិ នៅ រ.ប.វ.ត ។
- ដំណាក់កាលទី២៖ ថ្ងៃទី ១៧ ដល់ ៣១ ខែ ឧសភា ឆ្នាំ ២០០៨ ទស្សកិច្ចសិក្សានៅប្រទេសអាល្លឹម៉ង់ និងហូឡង់ ។
- ដំណាក់កាលទី៣៖ ថ្ងៃទី០១ ខែ មិថុនា ដល់ថ្ងៃទី ៣០ ខែ កញ្ញា ឆ្នាំ ២០០៨ ធ្វើកម្មសិក្សានៅអង្គជំរុំជម្រះវិសាមញ្ញក្នុងតុលាការកម្ពុជា (ECCC) ។
៣-៤ កិច្ចសហប្រតិបត្តិការសឹង្ហបូរី ៖
ស្ថានទូតសឹង្ហបុរីប្រចាំនៅកម្ពុជា បានជួយបង្រៀនភាសាអង់គ្លេសក្នុងវិស័យច្បាប់ (English for Law) ដល់សិស្សចៅក្រមគ្រប់ជំនាន់ ហើយទទួលយកសិស្សចៅក្រម២ ឬ៣នាក់ ជារៀងរាល់ឆ្នាំ ឱ្យទៅធ្វើកម្មសិក្សានៅប្រទេសសឹង្ហបូរី។ ជាក់ស្ដែង ក្នុងឆ្នាំ២០០៨ សាលាបានបញ្ជូនសិស្សចៅក្រម ជំនាន់ទី៣ ចំនួន៣នាក់ ឲ្យទៅធ្វើកម្មសិក្សានៅតុលាការជាន់ទាបនៃប្រទេសសឹង្ហបុរី។
៣-៥ កិច្ចសហប្រតិបត្តិការជាមួយអង្គការ និងស្ថាប័នផ្សេងៗ ៖
អង្គការ UNICEF បានជួយបណ្តុះបណ្តាលបឋម និងបន្ត លើប្រធានបទ យុត្តិធម៌អនីតិជន និងការការពារសិទ្ធិកុមារ ព្រមទាំងបានជួយរៀបចំបោះពុម្ពសៀវភៅស្តីពីប្រធានបទខាងលើ ជូន រាជបណ្ឌិតសភាវិជ្ជាជីវៈតុលាការផងដែរ ។ ទីភ្នាក់ងារសហរដ្ឋអាមេរិកសម្រាប់ការអភិវឌ្ឍន៍អន្តរជាតិ (USAID) តាមរយៈ វិទ្យាស្ថានគ្រប់គ្រងបូព៌ា-បស្ចឹម (EWMI) បានជួយបណ្តុះបណ្តាលបឋម និងបន្តស្តីពី ច្បាប់ភូមិបាល និង ក្រមសីលធម៌ចៅក្រម ។ ក្រុមប្រឹក្សាអាជ្ញាកណ្តាលតាមរយៈ ILO ជួយបណ្តុះបណ្តាលដល់សិស្សចៅក្រម លើបញ្ហាវិវាទការងារ។ ចំណែកអង្គការមូលនិធិអាស៊ីវិញ (The Asia Foundation) កំពុងស្នើសុំជួយបង្រៀនលើប្រធានបទ ការប្រឆាំងការជួយដូរមនុស្ស សម្រាប់ឆ្នាំ២០០៩ ។
៤- ការជ្រើសរើសចៅក្រមពាណិជ្ជកម្ម
យោងតាមប្រកាស លេខ១០៩ ប្រក ស្តីពីការបង្កើតគណៈកម្មការជ្រើសរើសចៅក្រម ដើម្បីបំពេញមុខងារ ជាចៅក្រម ជំនាញក្នុងវិវាទពាណិជ្ជកម្ម ចុះថ្ងៃទី១១ ខែ ធ្នូ ឆ្នាំ ២០០៧ របស់ទីស្តីការគណៈរដ្ឋមន្ត្រី សម្រាប់ឆ្នាំ ២០០៨ រាជបណ្ឌិតសភា វិជ្ជាជីវៈតុលាការ ទទួលបានបេក្ខជន ដែលដាក់ពាក្យសុំប្រឡងប្រជែង ចំនួន២៩នាក់ (ស្រី៣នាក់)។ គណៈកម្មការធ្វើការសម្ភាសន៍ ២លើក គឺលើកទី១ មានបេក្ខជន ១៣នាក់ បានជាប់ និងលើកទី២ មានបេក្ខជន០៥នាក់បានជាប់។ សរុបបេក្ខជន ដែលបានធ្វើសម្ភាសន៌ជាប់មានចំនួន ១៨នាក់ (ស្រី ០៣នាក់) ដែលត្រូវឲ្យធ្វើការហ្វឹកហាត់យកវិញ្ញាបនប័ត្រ ដើម្បីប្រកបមុខងារជាចៅក្រមជំនាញខាងជំនុំជម្រះវិវាទពាណិជ្ជកម្ម ក្នុយុត្តាធិការពាណិជ្ជកម្ម ដែលនឹងត្រូវបង្កើតនាពេលខាងមុខ។
៥- ការបើកបង្រៀនត្រៀមសម្រាប់ការប្រឡងប្រជែងជ្រើសរើសសិស្សចៅក្រមជំនាន់ទី៥
រាជបណ្ឌិតសភាវិជ្ជាជីវៈតុលាការ បានបើកង្រៀនថ្នាក់ត្រៀមសម្រាប់ ប្រឡងប្រជែងជ្រើសរើសសិស្សចៅក្រម ជំនាន់ទី៥ ដែលមានរយៈពេល ៣ខែ ចាប់ពីថ្ងៃទី ១៥ ខែតុលា ឆ្នាំ២០០៨ ដល់ថ្ងៃទី២១ ខែមករា ឆ្នាំ២០០៩។ ក្នុងវគ្គនេះ មានសិស្សសរុបចំនួន ៦៣នាក់ ដែលបានសិក្សាលើមុខវិជ្ជាចំនួន ៣ គឺ វប្បធម៌ទូទៅ នីតិព្រហ្មទណ្ឌ (គោលការណ៍ទូទៅនៃនីតិវិធីព្រហ្មទណ្ឌ ការវិភាគសាលក្រម និងសាដីកាព្រហ្មទណ្ឌ) និងនីតិរដ្ឋប្បវេណី(គោលការណ៍ទូទៅ នៃនីតិរដ្ឋប្បវេណី ការវិភាគសាលក្រម និងសាលដីការដ្ឋប្បវេណី)។
៦- ការងារសាងសង់
អគារថ្មីមានកំពស់៤ជាន់ របស់រាជបណ្ឌិតសភាវិជ្ជាជីវៈតុលាការ ដែលជាជំនួយរបស់ជប៉ុន បានចាប់ផ្ដើមសាងសង់ តាំងពីខែកក្កដា ឆ្នាំ២០០៦ ហើយបានបញ្ចប់ទាំងស្រុងនៅខែមិថុនា ឆ្នាំ២០០៨។ អគារថ្មីនេះ ត្រូវបានប្រើប្រាស់តាំងពីខែសីហា ឆ្នាំ២០០៨ មកម៉្លេះ ទោះជាអគារនេះមិនទាន់បានសម្ភោធឲ្យប្រើប្រាស់ជាផ្លូវការក៏ដោយ។