អារម្ភកថា(ត)
សាលាភូមិន្ទក្រឡាបញ្ជី ៖ ដោយមានការគាំទ្រពីគម្រោងនីតិរដ្ឋ “របស់បារាំង” សាលាភូមិន្ទក្រឡាបញ្ជី នៃរាជបណ្ឌិតសភាវិជ្ជាជីវៈ តុលាការបាន រៀបចំបើក វគ្គសុក្រឹតការ មន្ត្រីក្រឡាបញ្ជីដើម្បី បង្កើនសមត្ថភាពយល់ដឹង លើផ្នែកច្បាប់ និងការអនុវត្តន៍ជាក់ស្តែង ។ វគ្គសុក្រឹត្យការមន្ត្រីក្រឡាបញ្ជីត្រូវបានរៀបចំជា៧ វគ្គក្នុងមួយវគ្គមានរយៈពេល ៣ ខែ និងមានមន្ត្រីសុក្រឹត្យការ ក្រឡាបញ្ជី ចំនួន៩០ ទៅ ១០០ នាក់ មកទទួលការបណ្តុះបណ្តាល និងរៀបំឱ្យមានវគ្គពិសេសមួយសម្រាប់ អ្នក ដែលមិនទទួល បានជោគជ័យស្ថាពរ ក្នុងការប្រឡងបញ្ចប់ ។ ជារួមមន្ត្រីក្រឡាបញ្ជីចំនួន ៦៥៧ នាក់ក្នុងទូទាំងប្រទេស បានមក ទទួលការ បណ្តុះបណ្តាល ពីសាលាភូមិន្ទក្រឡាបញ្ជី នៃរាជបណ្ឌិតសភាវិជ្ជាជីវៈតុលាការ ។ ក្រៅពីធ្វើសុក្រឹត្យការមន្ត្រីក្រឡាបញ្ជីសាលាភូមិន្ទក្រឡាបញ្ជី នឹងរៀបចំប្រឡងប្រជែងជ្រើសរើសសិស្សឱ្យរៀនវិជ្ជាជីវៈក្រឡាបញ្ជីក្នុងខែ មីនា ឆ្នាំ ២០០៨ ។
ខ្ញុំនិងសហការីរបស់ខ្ញុំ ព្រមទាំងក្រុមគ្រូបណ្តុះបណ្តាល បានដឹងយ៉ាងច្បាស់អំពីតម្រូវការរបស់សង្គមក្នុងការបណ្តុះបណ្តាលហេតុដូច្នេះហើយ រាជបណ្ឌិតសភាវិជ្ជាជីវៈតុលាការ នឹងធ្វើការកែលំអរខ្លួនឱ្យសក្តិសមជាស្ថាប័នទំនើបរបស់ជាតិនឹងឈានទៅដល់កម្រិតអន្តរជាតិនាពេលអនាគត ។
ក្រោមការដឹកនាំ និងការផ្តល់អានុសាសន៍ដ៏ខ្ពង់ខ្ពស់របស់ឯកឧត្តម សុខ អាន ឧបនាយករដ្ឋមន្ត្រី រដ្ឋមន្ត្រី ទទួលបន្ទុកទីស្តីការគណៈរដ្ឋមន្ត្រី និងជាប្រធានក្រុមប្រឹក្សាភិបាល ។ រាជបណ្ឌិតសភាវិជ្ជាជីវៈតុលាការបាននឹងកំពុងរៀបចំបង្កើតសាលាបណ្តុះបណ្តាលវិជ្ជាជីវៈចំនួនពីរគឺ សាលាភូមិន្ទអាជ្ញាសាលា និងសាលាភូមិន្ទសាការីបន្ថែមទៀតដើម្បីឆ្លើយតបនឹងការ អនុវត្តន៍ នីតិវិធីព្រហ្មទណ្ឌនិងក្រមនីតិវិធីរដ្ឋប្បវេណីនិងដើម្បីឱ្យការបម្រើសេវាយុត្តិធម៌កាន់តែទទួលបានទំនុកចិត្តពីសាធារណៈជន ។
ជាមួយនឹងការគាំទ្ររបស់បារាំង សេចក្តីព្រាងលក្ខន្តិកៈសាការី និងអាជ្ញាសាលាត្រូវបានរៀបចំបង្កើតឡើងជា បន្តបន្ទាប់ហើយ តាមរយៈការគាំទ្រនេះបានជួយឱ្យរាជបណ្ឌិតសភាវិជ្ជាជីវៈតុលាការបានចូលរួម យ៉ាងទូលំទូលាយរួចមក ហើយនៅក្នុងដំណើរការ អភិវឌ្ឍន៍បច្ចេកវិទ្យាថ្មី និងមធ្យោបាយបណ្តុះបណ្តាល ជាពិសេសតាមរយៈ ការរៀបចំការបណ្តុះបណ្តាល អន្តរសកម្ម ដូចជាការរៀបចំសម្តែងការធ្វើសវនាការត្រាប់រឿងព្រហ្មទណ្ឌដោយថតជាវីដេអូ ការប្រើប្រាស់់បច្ចេកទេសព័ត៌មានវិទ្យាសម្រាប់ ការបណ្តុះបណ្តាល ។ រាជបណ្ឌិតសភាវិជ្ជាជីវៈតុលាការ រៀបចំផងដែរនូវការធ្វើកម្មសិក្សានៅតុលាការបរទេស នៅប្រទេសបារាំងសម្រាប់សិស្សនិយាយភាសាបារាំង ។ ជាក់ស្តែង សិស្សចៅក្រមបីនាក់ បានចេញទៅធ្វើកម្មសិក្សារយៈពេលមួយខែ នៅសាលាឧទ្ធរណ៍ Amiens នៅប្រទេសបារាំង។ លើសពីនេះ រាជបណ្ឌិតសភាវិជ្ជាវិជ្ជាជីវៈតុលាការបន្តកិច្ចខំប្រឹងប្រែងរបស់ខ្លួន ក្នុងផ្នែកទំនាក់ទំនងដោយបង្កើតនូវ គេហទំព័រអ៊ីនធើណេតមួយ និងបោះពុម្ពផ្សាយនូវសៀវភៅស្តើង ដើម្បីលើកតម្កើងនិងផ្សព្វផ្សាយកម្មវិធីបណ្តុះបណ្តាលរបស់ខ្លួនកាន់តែទូលំទូលាយ។ ព័ត៌មានប្រកបដោយគុណភាព នឹងបង្កើតនូវការទាក់ទាញ ពីសាធារណជនជាយុវនិស្សិត និង យុវមន្ត្រីរាជការ នៃព្រះរាជាណាចក្រកម្ពុជា ឱ្យចាប់អារម្មណ៍ និងចូលរួមប្រឡងប្រជែង ។
រាជបណ្ឌិតសភាវិជ្ជាជីវៈតុលាការ មានមហិច្ឆតាចង់ទទួលបានឋានៈជាមជ្ឈមណ្ឌលដ៏ពិសេស សម្រាប់ការបណ្តុះបណ្តាលនិងទំនើបកម្មវិជ្ជាជីវៈតុលាការ។ រាជបណ្ឌិតសភាវិជ្ជាជីវៈតុលាការ ដើរតួនាទីចម្បង តាមរយៈ ការបណ្តុះបណ្តាល ដែលរៀបចំឡើង ក្នុងការផ្តល់ដល់ស្ថាប័ននានានូវចៅក្រម មន្ត្រីតុលាការ និងអ្នកវិជ្ជាជីវៈផ្នែកច្បាប់ជំនាន់ថ្មី ដែលបានទទួលការ បណ្តុះបណ្តាលត្រឹមត្រូវមានសមត្ថភាព អាចនាំមកនូវភាពទំនើបដែលអាចជម្រុញចលនាថ្មី និងមានភាពស្វាហាប់ក្នុងឆន្ទៈ បម្រើប្រជាពលរដ្ឋនិងរដ្ឋ តាមរយៈភាពម្ចាស់ការលើអាជីពរបស់ខ្លួននិងបច្ចេកវិទ្យាថ្មី ។
ប្រសាសន៍របស់ខ្ញុំ មិនអាចពេញលលេញបានទេ ប្រសិនបើ់ ខ្ញុំមិនបានថ្លែងអំណរគុណ ដល់លោក Pierre ESPIEU ប្រធាន គម្រោង “ទ្រទ្រង់នីតិរដ្ឋ” និងក្រុមការងាររបស់គាត់ ចំពោះការគាំទ្រការចំណាយពេលវេលាដ៏មានតម្លៃ និងភក្តីភាពដែល ផ្តល់ឱ្យ រាជបណ្ឌិតសភាវិជ្ជាជីវៈតុលាការ ។
ប្រធានរាជបណ្ឌិតសភាវិជ្ជាជីវៈតុលាការ
ទេព ដារ៉ុង