ថ្ងៃអង្គារ ៤រោច ខែជេស្ឋ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី០៩ ខែមិថុនា ឆ្នាំ២០២០, ក្រុមប្រឹក្សាវិន័យ នៃរាជបណ្ឌិតសភាវិជ្ជាជីវៈតុលាការ ដឹកនាំដោយ ឯកឧត្តមបណ្ឌិតរដ្ឋ ឈន ព្រលឹង ប្រធានរាជបណ្ឌិតសភាវិជ្ជាជីវៈតុលាការ បានជួបប្រជុំពិភាក្សាជាមួយ ឯកឧត្តម ជិន ម៉ាលីន រដ្ឋលេខាធិការក្រសួងយុត្តិធម៌ អំពីការពិនិត្យ និងសម្រេចរបាយការណ៍វិន័យ របស់សិស្សក្រឡាបញ្ជី ជំនាន់ទី ៦ នៃរាជបណ្ឌិតសភាវិជ្ជាជីវៈតុលាការ។

នៅព្រឹកថ្ងៃសុក្រ ១៥កើត ខែជេស្ឋ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី០៥ ខែមិថុនា ឆ្នាំ២០២០, គណៈកម្មការបច្ចេកទេស និងវិទ្យាសាស្ត្រ នៃរាជបណ្ឌិតសភាវិជ្ជាជីវៈតុលាការ ដឹកនាំដោយ ឯកឧត្តមបណ្ឌិតរដ្ឋ ឈន ព្រលឹង ប្រធានរាជបណ្ឌិតសភាវិជ្ជាជីវៈតុលាការ បានជួបប្រជុំពិភាក្សាជាមួយ ឯកឧត្តម ជិន ម៉ាលីន រដ្ឋលេខាធិការក្រសួងយុត្តិធម៌ និងសហការី ដើម្បីពិភាក្សាអំពីការធ្វើបច្ចុប្បន្នភាព និងទំនើបកម្មកម្មវិធីសិក្សា ដោយផ្តោតលេីគម្រោងអភិវឌ្ឍធនធានមនុស្សក្នុងវិស័យច្បាប់ និងយុត្តិធម៌ អោយកាន់តែប្រសេីរឡេីង តាមរយ:ការបណ្តុះបណ្តាលបឋម -បន្ត វិក្រឹតការ និងសុក្រឹតការ នៅរាជបណ្ឌិតសភាវិជ្ជាជីវៈតុលាការ។

នៅថ្ងៃសុក្រ ៨កើត ដល់ថ្ងៃច័ន្ទ ១១កើត ខែជេស្ឋ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី២៩ ខែឧសភា ដល់ថ្ងៃទី០២ ខែមិថុនា ឆ្នាំ២០២០, រាជបណ្ឌិតសភាវិជ្ជាជីវ:តុលាការបានរៀបចំពិធីវាយតម្លៃការការពាររបាយការណ៍កម្មសិក្សារបស់សិស្សក្រឡាបញ្ជី ជំនាន់ទី ៦ ចំនួន ៩៩ នាក់ ជាលក្ខណ:ឯកត្តជនលើប្រធានបទ ចំនួន ២ ពាក់ព័ន្ធនឹងផ្នែករដ្ឋប្បវេណី និងផ្នែកព្រហ្មទណ្ឌ ក្រោយពីបានបញ្ចប់កាសិក្សាវគ្គសិក្ខាគារិគភាពរយ:ពេល ៦ ខែ នៅរាជបណ្ឌិតសភាវិជ្ជាជីវៈតុលាការ និងចុះកម្មសិក្សារយ:ពេល ៦ ខែ នៅតាមសាលាដំបូង និងអយ្យការអមសាលាដំបូងរាជធានី-ខេត្ត និង សាលាឧទ្ធរណ៍ និងមហាអយ្យការអមសាលាឧទ្ធរណ៍ ចំនួន ៧។ សិស្សម្នាក់ៗត្រូវបានតម្រូវឲ្យសរសេររបាយការណ៍កម្មសិក្សាយ៉ាងតិច ចាប់ពី ២០-៤០ ទំព័រ សម្រាប់ប្រធានបទនីមួយៗ ព្រមទាំងត្រូវធ្វើបទបង្ហាញ និងការពាររបាយការណ៍របស់ខ្លួនចំពោះមុខគណ:មេប្រយោគ ។
ការពង្រឹងប្រសិទ្ធភាព និងគុណភាព នៃការបណ្តុះបណ្តាល ប្រកបដោយក្រមសីលធម៌វិជ្ជាជីវ: គឺជាកាតព្វកិច្ចរបស់រាជបណ្ឌិតសភាវិជ្ជាជីវ:តុលាការ។

នៅថ្ងៃច័ន្ទ ១២រោច និងថ្ងៃអង្គារ ១៣រោច ខែពិសាខ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី១៨-១៩ ខែឧសភា ឆ្នាំ២០២០, រាជបណ្ឌិតសភាវិជ្ជាជីវៈតុលាការ បានរៀបចំបទឧទ្ទេសនាម​ ស្តីពី ការត្រៀមលក្ខណៈសម្បត្តិសម្រាប់ការការពាររបាយការណ៍កម្មសិក្សា​ របស់សិស្សក្រឡាបញ្ជី ជំនាន់ទី ៦។ បទឧទ្ទេសនាមនេះរៀបចំឡេីងក្នុងគោលបំណង​ ណែនាំ​ និងក្រេីនរំឭកដល់សិស្សឲ្យយល់ដឹងអំពីលក្ខខណ្ឌតម្រូវ​ចាំបាច់នានា ដេីម្បីត្រៀមលក្ខណ:សម្បត្តិអោយបានគ្រប់គ្រាន់ មុននឹងធ្វេីបទបង្ហាញរបាយការណ៍របស់ខ្លួនចំពោះមុខគណ:កម្មការវាយតម្លៃប្រកបដោយគុណភាព​ និងទេពកោសល្យ ដែលការការពាររបាយការណ៍កម្មសិក្សានេះសិស្សកម្មសិក្សាម្នាក់ៗ ត្រូវការពាររបាយការណ៍ ចំនួន ២ ប្រធានបទ រួមមានផ្នែករដ្ឋប្បវេណី និងផ្នែកព្រហ្មទណ្ឌ ដែលគ្រោងនឹងចាប់ផ្តើមនៅសប្តាហ៍ទី ៣ នៃខែឧសភា ឆ្នាំ២០២០ នេះតទៅ។

នៅថ្ងៃសុក្រ ២រោច ខែពិសាខ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី៨ ខែឧសភា ឆ្នាំ២០២០, រាជបណ្ឌិតសភាវិជ្ជាជីវៈតុលាការ បានរៀបចំកិច្ចប្រជុំពិភាក្សា ដើម្បីពិនិត្យលើវឌ្ឍនភាព និងធ្វើបច្ចុប្បន្នភាព នៃការបណ្តុះបណ្តាលសិស្ស នៃរាជបណ្ឌិតសភាវិជ្ជាជីវៈតុលាការតាមប្រព័ន្ធ Online ដោយបានប្រើប្រាស់កម្មវិធី Google Meet និងបង្កើត Google Classroom សម្រាប់ការបណ្តុះបណ្តាលសិស្សវិជ្ជាជីវៈតុលាការ នៃសាលាភូមិន្ទនីមួយៗ។ ទន្ទឹមនឹងនេះដែរ កិច្ចប្រជុំបានពិភាក្សា និងពិនិត្យលើលទ្ធភាពដើម្បីឆ្លើយតបទៅនឹងតម្រូវការនៃការដាក់ដំណើរការកម្មវិធីបណ្តុះបណ្តាល Online ក្នុងដំណាក់កាលអន្តរកាលនៃការទប់ស្កាត់ និងបង្ការការរាលដាលជម្ងឺកូវីត(COVID-19) ដោយបំពាក់បន្ថែមនូវសម្ភារៈបរិក្ខា ជំរុញ និងពង្រឹងឲ្យមានការតភ្ជាប់នូវប្រព័ន្ធ Internet បន្ថែម ដើម្បីតភ្ជាប់នឹងការប្រើប្រាស់បានរលូន ព្រមទាំងបំពាក់បំប៉ន និងអភិវឌ្ឍធនធានមន្ត្រីទទួលបន្ទុកបណ្តុះបណ្តាលនៃសាលាភូមិន្ទនីមួយៗ នៃរាជបណ្ឌិតសភាវិជ្ជាជីវៈតុលាការដើម្បីជួយសម្របសម្រួល នឹងបំពេញបន្ថែមនូវការធ្វើបទឧទ្ទេសនាមតាមប្រព័ន្ធ Online ជូនដល់សិស្សនៃសាលាភូមិន្ទនីមួយៗ តាមកម្មវិធី និងកាលវិភាគប្រចាំសប្តាហ៍។ កិច្ចប្រជុំនេះបានប្រព្រឹត្តទៅយ៉ាងរលូន និងប្រកបដោយផ្លៃផ្កា។

នៅថ្ងៃព្រហស្បតិ៍ ៩កើត ខែពិសាខ ឆ្នាំជូត ទោស័ក ព.ស ២៥៦៣ ត្រូវនឹងថ្ងៃទី៣០ ខែមេសា ឆ្នាំ២០២០, រាជបណ្ឌិតសភាវិជ្ជាជីវៈតុលាការ បានរៀបចំកិច្ចប្រជុំគណៈកម្មការបច្ចេកទេស និងវិទ្យាសាស្ត្រ ដើម្បីរៀបចំកម្មវិធីសម្រាប់វាយតម្លៃការការពាររបាយការណ៍ និងត្រៀមលក្ខណៈសម្បត្តិរៀបចំការប្រឡងបញ្ចប់វគ្គបណ្តុះបណ្តាលសិស្សសារការី ជំនាន់ទី ២ នាពេលឆាប់ៗខាងមុខនេះ។

នៅថ្ងៃព្រហស្បតិ៍ ២កើត ខែពិសាខ ឆ្នាំជូត ទោស័ក ព.ស ២៥៦៣ ត្រូវនឹងថ្ងៃទី២៣ ខែមេសា ឆ្នាំ២០២០, រាជបណ្ឌិតសភាវិជ្ជាជីវៈតុលាការ បានរៀបចំកិច្ចប្រជុំគណៈកម្មការបច្ចេកទេស និងវិទ្យាសាស្ត្រ ដែលមានសមាសភាពចូលរួមពីសំណាក់ថ្នាក់ដឹកនាំរាជបណ្ឌិតសភាវិជ្ជាជីវៈតុលាការ នាយកសាលាភូមិន្ទចៅក្រម ក្រឡាបញ្ជី គ្រូឧទ្ទេសនាម សាស្ត្រាចារ្យ និងមន្ត្រីទទួលបន្ទុកបណ្តុះបណ្តាលសាលាភូមិន្ទនីមួយៗ បានប្រជុំពិភាក្សាដើម្បីពង្រឹងបច្ចេកទេសវិទ្យាសាស្ត្រ គរុកោសល្យ នៃការបង្រៀន ដោយជ្រើសរើសការបង្រៀនតាមប្រព័ន្ធ Online ដោយបានជ្រើសរើសយកកម្មវិធី Google Meet និងបង្កើត Google Classroom សម្រាប់ការបណ្តុះបណ្តាល Online ដល់សិស្សនៃសាលាភូមិន្ទទាំង ៤ នៃរាជបណ្ឌិតសភាវិជ្ជាជីវៈតុលាការ ក្នុងអន្តរកាលនៃការទប់ស្កាត់ និងបង្ការការរាលដាលជម្ងឺកូវីត(COVID-19) ស្របតាមអនុសាសន៍ណែនាំដ៏ខ្ពង់ខ្ពស់របស់ឯកឧត្តមរដ្ឋមន្រ្តីក្រសួងយុត្តិធម៌ និងជាប្រធានក្រុមប្រឹក្សាភិបាលនៃរាជបណ្ឌិតសភាវិជ្ជាជីវ:តុលាការ និងក្រសួងសុខាភិបាលនៃព្រះរាជាណាចក្រកម្ពុជា ។

នៅថ្ងៃពុធ ១កើត ខែពិសាខ ឆ្នាំជូត ទោស័ក ព.ស ២៥៦៣ ត្រូវនឹងថ្ងៃទី២២ ខែមេសា ឆ្នាំ២០២០, រាជបណ្ឌិតសភាវិជ្ជាជីវៈតុលាការ បានរៀបចំការប្រឡងបញ្ចប់វគ្គបណ្តុះបណ្តាលសិស្សសាលាភូមិន្ទក្រឡាបញ្ជី ជំនាន់ទី ៦ ចំនួន ៣ វិញ្ញាសា ដូចខាងក្រោម:
១. វិញ្ញាសា ស្តាប់ និងកត់ត្រាដោយឧបករណ៍អេឡិចត្រូនិច
២. វិញ្ញាសា ផ្នែកព្រហ្មទណ្ឌ
៣. វិញ្ញាសា ផ្នែករដ្ឋប្បវេណី

នាព្រឹកថ្ងៃអង្គារ ១៥កើត ខែចេត្រ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី៧ ខែមេសា ឆ្នាំ២០២០ នៅទីស្តីការក្រសួង ឯកឧត្ដម កើត រិទ្ធ រដ្ឋមន្ត្រីក្រសួង យុត្តិធម៌ និងថ្នាក់ ដឹកនាំក្រសួង បានធ្វើការ បែងចែកម៉ាស់ ចំនួន ៦០.០០០ ម៉ាស់ និងជែល ចំនួន៥០០ដប ជូនទៅកាន់សាលាជម្រះក្តីគ្រប់ជាន់ថ្នាក់ អគ្គលេខាធិការដ្ឋាន ឧត្តម ក្រុមប្រឹក្សា នៃអង្គចៅក្រម និងរាជបណ្ឌិតសភាវិជ្ជាជីវ:តុលាការ ៕